ROXAS CITY, CAPIZ- Pilason ang isa ka lalaki matapos nga ginlabo sang motorista nga iya ginsita bangud sa paggamit sang ‘open muffler’ nga tambutso nga nagtuga sang tuman ka-gahod sa Barangay Lawaan, Roxas City.
Ang biktima amo si alyas ‘Norman’, yara sa legal nga edad kag residente sang nasambit nga lugar. Samtang ang mga suspek amo sanday alyas “Josh” kag alyas “Nick”.
Sa interview sang Bombo Radyo kay Police Major Marvin R. Balmes, Deputy Chief of Police sang Roxas Component City Police Station, iya ginpahayag nga samtang nagapahuway ang biktima sa ila nga garahe, naglabay ang amo nga motorsiklo sang mga motorista nga nagtuga sang tuman ka-gahod rason nga naistorbo ang iya sini nga pagpahuway.
Bangud sini, ginsita sang biktima ang mga suspek hanungod sa amo nga gahod nga gintuga sini.
Base sa salaysay sang biktima, wala sya ginsapak sang suspek apang makaligad ang pila ka minuto, nagbalik ang mga ini nga may bitbit na nga talibong kag hinali nalang ini sya nga ginlabo.
Nag-angkon sang mga pilas sa ulo, kilid, kag butkon ang biktima nga gilayon ginpadangat sa Roxas Memorial Provincial Hospital para sa nagakaigo nga pagbulong.
Samtang, madasig naman nga nagpalagyo ang mga suspek matapos nga nakomiter ang amo nga hitabo.
Nagapadayon sa karon ang imbestigasyon sang mga kapulisan agud matumod ang address sang mga suspek kag mahatagan sang nagakaigo nga kaso batok sa ila.
With a report from Bombo Jessa Mae De Los Santos
