-- ADVERTISEMENT --
Nagpatigayon sang checkpoint ang Land Transportation Office kag Traffic Management Unit sa Bypass Road, malapit sa Roxas Airport sa Brgy. Baybay, Roxas City.
Ini agud masiguro nga ang mga motorista may legal nga dokumento kag malikawan ang disgrasya kag krimen sa dalanon.
Sa interview sang Bombo Radyo kay Atty. Allan D. Sacramento, Acting Chief sang LTO Capiz, iya ginpahayag nga indi dapat maglikaw ang mga motorista sa checkpoint, kaangay sang gulpi lang nga pagliko, bangud delikado ini kag mahimo magresulta sa disgrasya.
Suno kay Sacramento, may posibilidad nga masuspinde ang driver’s license sang motorista kon maglapas sa mga pagsulondan sa dalanon.
Ginpanugyan niya ang mga motorista nga maghalong kag indi magdali-dali samtang nagamaneho.
