EASTERN CAPE, SOUTH AFRICA- Indi magnubo sa 49 ka-tawo ang napatay, kalakip ang apat ka mga bata nga estudyante, matapos ang mabaskog nga pag-ulan kag landslide sa Eastern Cape province sang South Africa sang Miyerkules, suno sa mga opisyal.
Suno kay Eastern Cape Premier Lubabalo Oscar Mabuyane, kalakip sa mga napatay ang apat ka mga kabataan, isa ka driver, kag isa ka conductor sang school minibus nga gin-anod sang baha malapit sa syudad sang Mthatha. Apat pa ka mga estudyante ang padayon nga ginapangita samtang tatlo ang naluwas.
Ginabanta nga magataas pa ang numero sang mga napatay samtang nagapadayon ang search and rescue operations sa mga lugar nga gin-igo sang mabaskog nga ulan kag pagbaha.
Dugang pa ni Mabuyane, tumalagsahon ang kusog sang ulan kag pagbubo sang niyebe sini nga tigtulugnaw.
Suno sa mga opisyal, madamo nga mga lugar ang naglubog sa baha, kag ginatos nga pamilya ang temporaryo nga yara sa mga evacuation center sa tunga sang matugnaw nga tyempo. Apektado man ang mga imprastruktura, kalakip ang kuryente at suplay sang tubig.
Ginpahayag man ni South African President Cyril Ramaphosa nga padayon nga nagahulag kag nagahatag sang bulig ang National Disaster Management Centre sa mga krisis.
Samtang nagpanawagan man ang mga opisyal sang dugang nga mga kagamitan kag bulig, labi na kay isa lang ka helicopter ang sa karon ginagamit sa lugar.
Nagpaandam naman ang national weather service nga magapadayon pa ang paglain sang tyempo tubtob sa katunga-tungaan sang semana.
Base sa Green Climate Fund, ang South Africa ang vulnerable sa epekto sang climate change, na nagdala sang mas masami kag mas mabaskog nga pagbaha, pagmala sang duta, kag wildfire.
