MAAYON, CAPIZ – Nagapadayon sa karon ang ginapatigayon nga search and retrieval operation sang mga katapu sang Municipal Disaster Risk Reduction and Management Office (MDRRMO)-Maayon sa lawas sang kolektor nga gin-anod bangud sa mabaskog nga ilig sang tubig sa suba sang Poblacion Ilaya Maayon Capiz.
Suno kay Engr. Victoria Dampog, Mdrrm Officer sang banwa sang Maayon wala pa sa gihapon nakita ang lawas ni Jolo Agam sa suba kun sa diin ini gin-anod.
Aminado si Dampog nga humalin kahapon nabudlayan sila magpangita kaupod sang Philippine Coastguard (PCG) kag Bureau Fire Protection (BFP) bangud sa tuman ka baskog nga current sang tubig nga dala sang malain nga nga lakat sang panahon.
Ginkumpirmar ni Dampog nga narekober ang motorsiklo ni Agam apang ang lawas sini ang wala gid makit-an.
Nagapanawagan si Dampog sa kaiping nga kabanwahan sang Pontevedra kag Panitan sa diin konektado ang suba nga magpalab-ot gilayon sang impormasyon sa tion nga may masapwan nga persona sa ila lugar.
