Daku ang posibilidad nga dayunon sang mga contract of service kag casuals sang Roxas Memorial Provincial Hospital (RMPH) ang ila leave of absence, kun pag-abot sang Oktubre 5, 2021, indi pa sila makabaton sang ila sweldo.
Sa exclusive interview sang Bombo Radyo kay Mary Cris, isa ka job hire employee nga na-assign sa surgical ward sang amo nga ospital nga madamo sila nga mga kaupdanan ang desidido nga dayunon ang ila nga plano nga magleave of absence pananglitan mapaslawan nga mahatag ang ila sweldo.
Suno kay Mary Cris nga apektado na sila kag ang ila pamilya sa duha ka bulan nga wala pagbaton sang sweldo.
Daku nga impact ini sa ila bangud sa pandemya nga ginapangatubang sang kalibutan tuga sang COVID-19.
Aminado ini nga sadto na-atrasar man ang ila sweldo apang wala madugayan kag ini ang nag-abot.
Wala man nalikawan ni Mary Cris nga magpalab-ot sang ila sentimyento bangud kun tan-awon gina-risgo nila ang ila kabuhi kag nagaserbisyo sang maayo pinaagi sa pagtatap sa mga masakiton kag nagpositibo sa COVID-19. Nag-apelar ang mga empleyado sang RMPH sa Sangguniang Panlalawigan nga aprubahan na ang supplemental budget para maswelduhan na sila.
