SIGMA, CAPIZ – Ginahulat pa sang Local Government Unit sang Sigma sa probinsya sang Capiz ang abiso halin sa Department of Public Works and Highways Region 6 may kaangtanan sa mga pasilidad sang tatlo ka mga eskwelahan nga may yara sang litik bangud sa Setyembre 30 nga linog.
Sa interview sang Bombo Radyo kay Engr. John Lyndon Jarencio, Municipal Engineer, iya ginpahayag nga ginmanduan na sang LGU ang Capiz 2nd District Engineering Office nga ipasa ang report sa regional office kag maghingyo sang technical experts nga mag-inspect sang mga classrooms agud madetermina ang kadalumon sang damage sa mga school buildings.
11 tanan ka mga classrooms sa tatlo ka mga buluthuan ang nakitaan sang damages bangud sa linog lakip na diri ang Mianay National High School, Vicente Andaya Sr. National High School kag Jose Reyes Jarencio Elementary School.
Suno kay Engr. Jarencio, ang Department of Public Works and Highways regional office lamang ang makadeklara nga safe, ukon kinahanglan sang retrofitting ukon i-demolish ang mga school buildings nga may mga litik.
Gin-athag sang natungdan nga ang mga school buildings nga may damages ang indi proyekto sang local government unit.
