ROXAS CITY – Isa sa 21 ka mga empleyado sang Libas fishing port sa Barangay Libas, Roxas City ang nag-positibo sa rapid antibody test.
Ini ang ginkompirmar ni Barangay Kagawad Renante Araw-araw sang mainterview sang Bombo Radyo.
Kasunod ini sa pagpaidalom sa nasambit nga test sa amo nga mga empleyado matapos nag-positibo sa coronavirus disease (COVID-19) ang ila matag-as nga opisyal nga naga-edad sang 64 anyos nga lalaki nga residente sang Barangay Baybay.
Ang empleyado nga nag-positibo sa rapid test ang isa ka senior citizen nga babaye kag padayon sa karon nga gina-obserbahan samtang nagapaidalom sa strict home quarantine.
Hugot karon nga ginapatuman ang pagtsekyar sang temperatura sa mga nagasulod sa pwerto kag ginapasulat ang mga ini sang mga nagakaigo nga impormasyon sa log-in area.
May gina-isyu suno diri nga ID pass para makontrol ang mga nagasulod sa port.
Ginasaway man ang mga nagalapas sa health protocols kapareho sang pagsuksok sang face masks kag pag-obserbar sang physical distancing.
Temporaryo naman nga saraduhan ang nasambit nga port sumugod sa Lunes, Agosto 24.
