ROXAS CITY – Ginpasiguro sang Liga ng mga Barangay President sa siyudad sang Roxas nga indi sila mag-untat tubtob indi mabayaran sang duha ka mga suspek ang pagbuno-patay kay Punong Barangay Ruben “Godo” Fuentes sa McKinley St., Barangay III, Roxas City.
Suno kay Punong Barangay Virgilio “Yoyo” Santos sang Barangay Talon sining syudad nga indi pa nila mabaton tubtob subong ang nadangatan sang biktima sa kamot sang duha ka mga suspek nga sanday Virgilio Vigor kag Joseph Jamora nga lunsay mga tumandok sang probinsya sang Iloilo.
Ginpasalig ni Santos kag mga kaupdanan sini sa hanay sang politika nga mahatagan sang hustisya ang kamatayon ni Fuentes.
Dugang pa ni Santos nga magapatawag sila sang pagsinapol sa masunod nga semana agud mahinalaan sang mga kaupdanan sini nga mga Punong Barangay kun ano ang mahimo nga mabulig nila sa nabilin nga pamilya sang biktima.
Ginatugyan nalang sini sa mga nagakaigo nga otoridad kun ano ang mangin disposisyon sang mga suspek.
Matandaan nga ginpasakaan na sang kaso nga murder ang duha ka mga suspek nga nagpatay sa duhaka mga sibilyan.
Base sa inisyal nga imbestigasyon sang mga pulis nga nakabaton sang impormasyon si Punong Barangay Ruben ‘Godo’ Fuentes nga may yara sang kinagamo sa KTV Bar rason nga nagpadulong ini sa lugar kaupod ang iya tanod nga si Cesar Edrosolano.
Naabtan mismo sang opiyal ang suspek nga si Virgilio Vigor nga nagatuga sang kinagamo sa sulod kag guwa sang KTV Bar rason nga ginsaway kag gin-istorya niya ini.
Apang sa baylo nga magpati ginbuno patay pa sang suspek ang amo nga biktima.
Bangud diri, gilayon nga ginbuligan ni Edrosolano ang biktima apang naigo naman ni sang kutsilyo sa tiyan.
Bangud diri nag-angkon sang patal nga pilas sa dughan kag kilid si Fuentes nga nagresulta sang iya kamatayon.
Nagtuyo pa magpalagyo ang mga suspek apang gilayon naman nga naaresto sa sulod sang Capiz State University – Main Campus kun sa diin narekober mismo kay Jamora ang kutsilo nga ginamit sa pagbuno sa mga biktima.
Sa karon, nakahunong na ini sa karsel sang Roxas City Police Station.
Mahibaluan nga lunsay mga ex-convict ang mga suspek kag may yara sang mga nagkalain-lain nga mga kaso antes pa man ang insidente.
