Nag-abot na sa Middle East ang linibo ka mga military army gikan sa elite 82nd Airborne Division sang U.S. Army, samtang ginabinag-binag ni U.S. President Donald Trump ang masunod nga tikang sa giyera batok sa Iran.
Nahibaluan nga ang mga army, gikan sa Fort Bragg sa North Carolina, ang dugang sa mga nauna nga gin-deploy nga mga pwersa sang Estados Unidos sang Amerika lakip na ang mga Marines, Navy, kag Special Operations Units.
Indi pa maathag kon sa diin ipadala ang nasambit nga mga tropa, apang ginalauman nga mangin kabahin ini sang preparasyon para sa posible mas malapad nga operasyon.
Sa subong, wala pa sang pinal nga desisyon kon bala magasulod ang tropa sang Amerika sa Iran.
Suno sa mga report, mahimo gamiton ang mga army sa nagkalain-lain nga misyon, lakip na ang pag-agaw sa Kharg Island, ang sentro sang halos 90% sang oil exports sang Iran, samtang ginasiguro ang luwas nga pag-agi sang mga oil tanker sa Strait of Hormuz.
Samtang, ginpahayag ni US President Donald Trump nga nakipaghinun-anon ang US sa mas “reasonable” nga liderato sang Iran agud tapuson ang giyera, apang nagpaandam man ini nga posible atakehon sang US ang mga pasilidad sang langis sang Iran kun indi mabuksan ang Strait of Hormuz.
