ROXAS CITY – Ginabasol sang ugangan nga lalaki ang live-in partner sang iya anak bangud ini ang nangin rason sa pagsunog-hungod sang mister sa ila kaugalingon nga puloy-an sa Barangay Cogon, Roxas City, alas-7:52 sang gab-i sang tinalikdan nga adlaw, Hunyo 4.
Sa Interview sang Bombo Radyo kay Jaime Casador, amay ni Oliver ‘Dodong’ Casador, ginpahayag sini nga bangud sa pagpangimon sang iya anak sa iya live-in partner nahimo sini nga sunugon ang ila puluy-an kun sa diin naulamid ang duwa ka panimalay.
Mahibaluan nga nagpadulong sa banwa sang Sapian si Pinky asawa sang suspek kag ginapahayag wala makapauli sang duwa ka adlaw bangud nagpamayle.
Katingalahan man suno kay tatay Jaime kun sa diin nagtiner si Pinky sa Sapian bangud wala man siya sang nahibaluan nga may parenti sila sa nasambit nga banwa.
Dugang pa sini, indi lang ini ang una nga beses nga nagpangimon ang iya anak sa iya partner, bangud sadtong nakaligad nga bulan sang Pebrero nag-away man ang mag-live in tubtob nga nagkalaguba ang ila puluy-an.
Gintuad man sini nga gintundaan na lamang sila sang iya kumpare nga magguwa na sa ila puluy-an bangud nagadaba-daba na ang kalayo gikan sa balay sang iya bata nga si Oliver.
Nalatalupangdan man ni tatay Jaime nga yara sa impluwensya sang makahulog nga ilimnon ang iya anak sang ginhimo ang pagpanunog.
Suno pa diri, matapos ang insidente wala pa makapakita sa ila si Pinky bangud sa Brgy. Domolog ini nagpauli.
Ginpahayag man sini, nga nakabaton na sila sang bulig gikan sa barangay kag sa City government.
Ginabulubanta nga may kahalitan nga P50,000 ang tatlo ka mga balay nga human sa light materials.//
Sa karon, nagapabilin sa kustodiya sang mga kapulisan sa syudad ang nasambit nga mister kag natalana nga mapasakaan sang nagakaigo nga panumbungon.
