ROXAS CITY – Ginpaidalom na sa state of calamity ang banwa sang President Roxas, Capiz bangud sa padayon nga pagtaas sang kaso sang balatian nga dengue sa probinsiya.
Ini ang ginkumpirma sa Bombo Radyo ni Pres. Roxas Mayor Receliste “Tanoy” Escolin sang mainterview sang Bombo Radyo Roxas.
Ginpahayag sini nga siya mismo ang nagrekomendar sa Sangguniang Bayan nga ipaidalom sa state of calamity ang lugar agud labi pa nga matutukan ang kampanya batuk sa nasambit nga balatian.
Mahibaluan nga nagapangduha ang President Roxas sa mga banwa sa probinsiya nga may pinakamadamo nga napagkit nga kaso sang dengue sa diin nagdangat na ini karon sa 156.
Nahibaluan nga sa pagpaidalom sa state of calamity sa nasambit nga banwa, mahimo na nga magamit sang lokal nga gobyerno ang ila nga calamity fund agud mas mapasangkad pa ang ila nga kampanya kontra dengue.
Una nga nagdeklara sang state of calamity sa ila banwa ang President Roxas.
