ROXAS CITY – Ginpahayag ni Lola Amalia nga masakit katama batyagon kag panumdumon ang pagpanakit sang isa ka anak sa iya kaugalingon nga iloy nga amu ang nagbun-ag, nag-atipan, kag nagpadako sa iya, bangud lamang sa rason nga wala ini nakapreparar sang pamahaw sa Sitio Pagutoc, Barangay Milibili, Roxas City.
Sa panaysayon ni Amalia Magaspar sang mainterview sang Bombo Radyo, ginsiling sini nga mabudlay na para sa iya nga tagaan pa sang tsansa ukon pasensyahon ang iya nga bata nga si Alan Magaspar bangud ginaliwat lang sa gihapon ang iya ginahimo nga pagpanakit.
Bangud diri, nag-apelar ini nga mapasakaan sang panumbungon nga seroius physical injury ang anak agud matudluaan sang leksyon kag marealisar ang mga sala sini nga buluhaton.
Dugang pa ni Lola, masakit katama batyagon nga kasubong nga daw mabuka ang iya nga tagipusuon bangud wala ini naka-agi sang pagpanakit sa iya ginikanan kag mga utod amu man sa iya bana, sa baylo mismo sa anak pa niya ini naagyan apisar ginhatag man niya ang tanan nga pagbulig kag pagpalangga.
Mahibaluan nga may yara sang kaugalingon nga pamilya si Magaspar, apang ginbulagan siya bangud man sang pagpangsakit kag tuman ka palahubog.
Ginalantaw ni Lola nga rason sang pagpanakit sang iya bata ang pagpangbarkada kag tuman sini nga kahulugbon rason nga wala na ini nakahibalo sang iya ginapanghimo.
Suno kay Lola Amalia, malawig na nga pagpasensya ang ginhatag niya sa anak sumugod sang una apang sa karon, indi na sini niya pagtugutan pa nga patup-an siya liwat sang inumol sini.
Dugang pa diri, ginsiling ni Lola Amalia nga palangga niya sa gihapon ang iya nga bata sa pihak sang mga ginpanghimo sini sa iya bangud suno diri wala sang iloy ang makasarang nga indi pagpalanggaon ang kaugalingon nga anak.
