Ginkasubo sang Liberal Party ang pagkakas sang Office of the Ombudsman bilang alkalde kay Iloilo City Mayor Jed Patrick Mabilog.
Sa interview sang Bombo Radyo kay LP provincial chairman Capiz Gov. Antonio del Rosario, ginpahayag sini nga wala ginalauman sang partido ang gulpiyad nga pagkakas sa alkalde sa serbisyo.
Suno kay del Rosario nga wala mahatagan sang kahigayunan si Mabilog agud depensahan ang iya kaugalingon sa mga kaso nga ginpasaka batuk sa iya ni anay Iloilo provincial administrator Manuel Mejorada.
Gindugang pa sini nga wala ginakwestiyon sang partido ang desisyon sang Ombudsman apang suno sa iya nga mas nakapaayo kun ginpamatian ang mga tawo nga nagbutang sa iya sa pwesto kag mga ginpangalagaran sini.
Suno pa sa gobernador nga ginatugyan na lamang sang LP sa mga tawo ang paghusga kay Mabilog bangud indi man lipod nga madamo ini sang hinimuan agud mapaayo kag mapasanyog ang siyudad sang Iloilo.
