ROXAS CITY – Patay ang isa ka butanding sang masapwan sa baybayon sang Barangay Libas, Roxas City.
Isa ka concerned citizen ang nagpalab-ot sang impormasyon kay punong barangay Dhonyl Alisasis sang Barangay Libas, Roxas City matapos nasaksihan ang pagbutong sang tatlo ka sakayan pangisda sa butanding ukon whale shark sa manabaw nga porsyon sang dagat.
Gilayon nga nagpangayo sang responde si punong barangay Alisasis sa Maritime police sa diin sa ila pag-abot sa lugar ila nakita ang patay nga butanding nga ginabulubanta nagahaba sang 25.5 ka tapak kag nagabug-at sang 3-4 ka tonelada.
Nahibaluan sang opisyal sa pila ka mga residente nga tatlo ka sakayan pangisda ang nagabutong sa butanding matapos nga nakasulod ini sa ila nga lambat
Posible na may plano nga katayin sang mga mangingisda ang butanding apang wala sang nahimo bangud nagabutlak na ang adlaw kag nahadluk sila nga madakpan.
Apang sa ila nga pagdali nga makabiya, ila pa nabilin ang palikpik nga plano nga dalhon para mabaligya.
