Mabuot, masinadyahon kag wala sang may kontra sa ila lugar si alyas “Toto tangkad” suno sa panaysayon ni nanay Neneng ang stepmother sang biktima.
Sa madugay nga pagtinir sang biktima sa lugar, wala man ini nagapati sa ginapahayag nga mamuno ang biktima kay suno sa iya, wala man ini nagadala sang armas kun ini ang nagalakat.
Matandaan nga dead on arrival na sang ginpandangat sa Roxas Memorial Provincial Hospital ang isa ka construction worker, matapos ginapahayag nga ginsumbag sa Teodoro Arcenas Trade Center, Brgy VIII, Roxas City.
Ginkilala ang biktima kay Rodantec “Toto tangkad” Villaranda, 39-anyos, kag residente sang Barangay Inzo Arnaldo, Roxas City.
Samtang ang ginapahayag naman nga suspek ang ginkilala kay Certain Ronaldo Balbona Alias “Tulisok”, yara sa legal nga pang-edaron, kag temporaryo nga nagapuyo sa Barangay Milibili, sining syudad.
Sa impormasyon nga nakuha sang Bombo Radyo nagikan sa Roxas City PNP, ginapahayag nga suno sa collector sang TATC nakit-an sini ang biktima nga nagahigda na lamang sa kilid sang gate kag wala na sang alentro.
Mahibaluan nga suno sa suspek, hinali lamang nga naghugot sang kutsilyo ang biktima apang bilang depensa ginsumbag sini ang biktima kag naigo sa baba kabangdanan sang iya pagkatumba kag nalipong.
Ginkumpirmar naman sini nga yara sa impluwensya sang makahulubog nga ilimnon ang nasambit nga bikitima.
