ROXAS CITY – Ginpahayag sang talatapan sang Municipal Social Welfare and Development Office (MSWDO) nga madamo sang mga nagpabutyag nga maga-adoptar sa lapsag nga gin-abandonar sang iya kaugalingon nga Iloy sa kasagingan nga bahin sang Barangay San Nicolas, Pilar, Capiz.
Sa interview sang Bombo Radyo kay Ms. Juditha Bernales, MSWD Officer, madamo sang mga taga-Pilar ang interesado nga mag-adopt sa lapsag, apang wala ang mga ini sang mga lisensiya nagikan sa DSWD agud mangin foster parent.
Nagakinahanglan suno diri nga mag-apply sang lisensiya sa Department of Social Welfare and Development-Region 6 bangud may mga ginahimo nga assessment ang ahensiya para sa adoption kag aminado si Bernales nga indi ini madali-dali.
Nahibaluan nga ba-se sa pagpangusisa kay ‘Sharon’ nga amu ang nakakita sa lapsag sa nasambit nga kasagingan, posible manug-isa na ka semana ang pang-edaron sang baby boy nga wala pa sa karon sang pangalan.
Wala man sang sakit ang bata magluwas sa lagob nga naangkon nga tuga sang mga kutot sang subay.
Sa karon, nagapabilin ini sa Jesus Colmenares District Hospital sa Balasan, Iloilo.
Ginmanduan man suno diri ni Mayor Arnold Perez ang MSWDO nga ihatag ang kinahanglanon sang gin-abandona nga lapsag.
