ROXAS CITY – Masuwerte nga naagaw sang isa ka maestro ang binangon nga pagagamiton sang suspek sa pagpanglabo sa iya sa guwa sang ila puloy-an, sa Barangay Lonoy, Roxas City.
Ginkilala ang tagreklamo kay Apolonio Bade, 51-anyos, manunudlo, kag residente sang nasambit nga barangay.
Samtang, ang suspek amu si Wilfredo Waymalay, karpentero kag tumandok sang Guimaras, apang nagapuyo sa Brgy. Lonoy, sini nga syudad.
Sandig sa ginpabalhag sang manunudlo sa mga kapulisan, nga samtang yara ini sa gate sang ila balay, yara man ang suspek nga nagabitbit sang binangon kag nagpamahog nga pagablab-on ang biktima.
Apang, sa bulig sang iya live-in partner naagaw sang mga ini ang binangon sang suspek.
Bangud diri, nagpangayo sila sang bulig kay Barangay Kapitan Ferdinand Valles kag natigayon nga madala sa mga kapulisan ang nasambit nga suspek.
Narekober ang binangon nga may kahabaon nga 17 ka pulgada.
Natalana man ini nga pasakaan sang nagakaigo nga panumbungon, samtang nagapadayon ang imbestigasyon sang mga kapulisan sa motibo sang suspek.
Mahibaluan nga ang COMELEC Gun Ban kun sa diin kalakip ang pagbitbit sang hinaniban sa publiko, ang tubtob sa Hunyo 8, 2022.
