PANITAN CAPIZ – Nag-angkon sang pilas sa magkatuhay nga parte sang lawas ang mag-amay matapos nga aksidente nga makabunggo ang ila ginasakyan nga multicab sa tatlo ka mga salakyan nga naka-park sa Barangay Tincupon, Panitan, Capiz.
Ang mga biktima amo sanday alyas “Elmer” yara sa legal nga pang-edaron kag alyas “Toto”, menor de edad, nga lunsay mga residente sa nasambit nga lugar.
Sa interview sang Bombo Radyo kay Police Staff Sargeant Mark Rendon, imbestigador sang Panitan Municipal Police Station, iya ginpahayag nga samtang ginasubay sang mag-amay ang dalanon upod ang tatlo sini ka mga sakay sa isa ka multicab nagikan sa banwa sang Panitan kag nagapuli na kuntani sa ila barangay sang akisidente nga nabungguan nila ang isa ka motorsiklo.
Suno kay Rendon, matapos makabunggo ang multicab sa motorsiklo, nagdiretso naman ang motor kag nagbunggo sa isa ka pick-up kag delivery van nga naka-park sa kilid sang dalan.
Pahayag pa niya, madulom kag wala sang mga street lights ang amo nga barangay.
Bangud sa mabaskog nga impact, nagupi ang mga salakyan kag nag-angkon sang pilas ang pila ka mga pasahero.
Sa subong, padayon pa ang imbestigasyon sang kapulisan agud matumod ang rason sa nagluntad nga insidente.
