BARANGAY PUNTA TABUC, ROXAS CITY – Dakop ang mag-iloy kaupod ang 4 pa ka mga indibidwal, matapos ang ginkasa nga drug buy-bust operation sa Barangay Punta Tabuc, Roxas City.
Sa interview sang Bombo Radyo kay Philippine Drug Enforcement Agency (PDEA) Capiz Provincial Officer Ma. Melinda Panaguiton ginpahayag sini nga ginkilala ang mga nagkaladakpan nga sanday Marilou Degala Abuyo, 54-anyos, subject sa drug buy bust operation, kag 17-anyos sini nga bata nga lalaki, Maliza Delo Santos Magbanua, 31-anyos, residente sang Barangay Lonoy, Leonardo Capote Bendoy, 24-anyos, residente sang Barangay Dingingan Ilawod, Ronmar Cañezares, 26-anyos, residente sang Barangay Baybay, Ronilo Araque, residente sang Barangay Punta Tabuc, sining syudad.
Suno kay Panaguiton, madugay na nila nga ginamonitor si Abuyo kung sa diin nagdugay ini sa Barangay Tanque tubtob nga nagsaylo na ini sa Barangay Punta Tabuc kung sa diin natigayon nga madakpan matapos mabaklan sang illegal nga droga sang mga otoridad.
Mahibaluan nga nakuha sa posesyon sang mga nagkaladakpan ang 16 tanan ka sachets sang ginapatihan shabu nga may estimated Standard Drug Price nga P108, 800.00 kay ginabulubanta may kabug-aton nga 16 gramos.
Mensahe ni Panaguiton sa padayon nga nagahimo sang kaangay sini nga buluhaton indi sila mag-untat tubtob nga madakpan ang mga ini kag mapanabat sa ginapatuman nga layi.
Sa karun yara na sa paghinakop sang Roxas City PNP ang mga nagkaladakpan para sa nagakaigo nga disposisyon.
