ROXAS CITY – Arestado ang mag live-in partner matapos nga nadakpan sa ginkasa nga drug buybust operation sang Provincial Drug Enforcement Unit sang Capiz Police Provincial Office (CPPO) sa Tambis St., Barangay Tiza, Roxas City.
Ginkilala ang mga nadakpan nga sanday June Laserna, 44-anyos kag live-in partner sini nga si Juvy Apolinario, 52-anyos, lunsay mga residente sang Sitio Pagutok, Barangay Milibili, sining syudad.
Narekober sa posesyon kag kontrol sang mag live-in partner ang 11 tanan ka mga plastic sachets nga ginapatihan shabu, P500 nga marked money, isa ka unit sang cellphone kag motorsiklo.
Ginkumpirmar ni Laserna nga sya ang subject sang buybust operation sang tinalikdan nga bulan sa Barangay Milibili apang nakapalagyo bangud namutikan sini nga tam-nan siya sang shabu sang operatiba.
Ginpanindugan sini nga wala ini nagaduso sang ilegal nga droga kag ginpanginwala nga ginapanag-iyahan sini ang mga narekober nga mga shabu.
Natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002 ang maglive-in partner.
