ROXAS CITY – Maga-updanay nga mapreso ang maglive-in partner, matapos nga nadakpan sa ginkasa nga drug buybust operation sang apat ka gintingub nga puwersa sang President Roxas, Pilar, Pontevedra MPS kag Provincial Drug Enforcement Unit (PDEU) sa Barangay Culilang, President Roxas, Capiz, alas 3:35 sa kaaganhon subong nga Huwebes.
Ginkilala ang nadakpan nga sanday Francisco Albaladejo III, 29-anyos, residente sang Railway St., Brgy, IX, kag live-in partner nga si Amicel Vergara, 33-anyos, sang Brgy. Lawaan, sini nga syudad.
Nakuha sa kontrol kag posesyon sang babayi ang tatlo tanan ka sachets sang ginasuspetsahan shabu, P2,000 nga buy bust money kun sa diin P100 lang diri ang genuine money.
Samtang, nakuha sa lalaki ang isa ka dako nga sachet sang ginaalegar iligal nga droga, cellphone, lighter kag motorsiklo nga Mio.
Ginabulubanta 5 ka gramo ang kabug-aton sang narekober nga mga suspected shabu nga may mas o menus P35,000 nga market value.
Sa karon, ginpadangat ang mga ini sa Iloilo City para sa drug test.
Magapangatubang sang panumbungon nga paglapas sa RA 9165 ukon Comprehensive Dangerous Drugs Act of 2002 ang nasambit nga mga persona.
