ROXAS CITY – Dead on arrival nga ginpadangat sa Dao District Hospital ang 19-anyos nga magulang, matapos nga ginbuno sang iya kaugalingon nga manghod, sa Brgy. Agsirab, Dumarao, Capiz.
Ginkilala ang biktima kay Arviy Palmes.
Samtang ang wala na ginhingadlan nga suspek kag manghod sang biktima ang nagapang-edaron sang 16-anyos kag lalaki.
Sandig sa impormasyon kag inisyal pa lamang nga imbestigasyon nagikan sa Dumarao MPS, nga magkaupod nga naga-inom-inom sang makahulubog nga ilimnon ang mag-utod kagab-i sang Huwebes, apang may nagluntad nga indi pag-intindihanay sa duha.
Ginaalegar nga nagkuha sang kutsilyo ang manghod kag ginbuno sa idalom nga porsyon sang dughan ang iya magulang.
Madasig nga nalagyo ang suspek matapos ang insidente kag padayon sa karon nga ginaayam sang kapulisan.
Nagaguwa nga posible bangud sa impluwensiya sang makahulubog nga ilimnon ang motibo sa krimen.
Nagapadayon ang imbestigasyon sa insidente.
