MAAYON CAPIZ – Nagapabilin nga naka-hospital arrest ang magulang nga naglabo-patay sa iya manghod sa Sitio Minuro, Barangay West Villaflores, Maayon Capiz.
Matandaan nga ginkilala ang napatay nga si Jennelyn Botis, 37-anyos samtang ang nagkalapilasan ang ginkilala nga sanday Lea Alcayde, 30-anyos kag Gilbert Morallos, 48-anyos kag ang suspek amu si Jonilon Morallos, 46-anyos lunsay residente sang nasambit nga lugar.
Sa interview sang Bombo Radyo sa hepe sang Maayon Municipal Police Station nga si PMaj. Syril Punzalan, ginpahayag sini nga nagluntad ang insidente bangud sa pagbinaisay sang suspek kag Gilbert tubtob nga nagdulom ang panan-awan sini nga nagresulta sa pagpanglabo sa iya mismo utod nga babaye.
Mahibaluan nga nag-angkon sang pilas ang biktima sa iya liog, kili-kili kung sa diin naglapos ini sa iya tagipusuon kag iban pa nga parte sang iya lawas.
Samtang lunsay pilas sa kamot naman ang naagum nanday Lea kag Gilbert tuga sang pagpanglabo.
Sa karun nagapabilin sa Roxas Memorial Provincial Hospital ang suspek samtang yara naman sa isa ka punerarya ang bangkay sang biktima.
