ROXAS CITY – Nangin emosyunal ang magulang sang 25 anyos nga merchandiser sang isa ka daku nga mall matapos nga nasapwan ang iya utod nga wala na sang kabuhi sang iya mga kaupdanan sa boarding house sa Barangay Tanque, Roxas City.
Suno kay Alvin Ta-ay, magulang sang biktima nga si Zaldy Ta-ay sang Barangay Dulangan, Pilar, Capiz nga tuman ang pagpangasubo sang ila nga pamilya sang nabaton ang impormasyon nga nasapwan nga wala na sang kabuhi ang iya manghod.
Halos indi makapati si Alvin bangud madamo pa sang handum si Zaldy sa iya nga kabuhi kag nagaproseso ini sang iya nga mga requirements sa pag-apply sa Philippine National Police (PNP) kag Philippine Coastguard (PCG).
Nagtrabaho lamang bilang merchandiser si Zaldy agud may yara sang gamiton nga kwarta sa iya pag-apply para sa iya handum nga trabaho.
Ginlaragway ni Alvin nga isa ka mabuot nga manghod si Zaldy.
Nagapati si Alvin nga wala sang foul play ang kamatayon ni Zaldy kag posible nga ginbangungot ang biktima.
