Liwat nga gin-athag sang aktres nga si Maine Mendoza nga ang ila manggad subong ang halin pa sa mga trabaho nila sadto antes pa man nagsulod sa pulitika ang iya bana nga si Quezon City 1st District Rep. Arjo Atayde nga isa man ka aktor.
Matandaan nga nalawagan si Arjo sang mag-asawa nga Discaya nga nalakip sa mga congressmen nga ginaalegar nagakuha sang porsyento ukon kickback halin sa pondo sang mga government projects.
Suno kay Maine, ang tanan nga yara sa ila subong ang halin sa ila kaugalingon nga pagpanikasog kag malawig nga pagpangabudlay.
Ginpanindugan sang aktres nga tampad ang mga ini nga nagabayad sang buwis kag may ikasarang nga suportahan ang ila pangabuhi nga wala nagasalig sa kwarta gikan sa gobyerno.
Pahayag pa niya, masakit nga akusahan sila nga nagabenepisyo sa pulitika nga sa pagkamatuod, wala man sila may ginatago.
Dugang pa sang natungdan, maga-agi sila sa nagakaigo nga proseso sang kasuguan kag ma-file sang legal action agud matinluan ang pangalan ni Arjo.
Nagapanindugan si Maine nga indi tanan nga pulitiko corrupt kag ginhingyo niya ang publiko nga indi gilayon magpati sa mga alegasyon nga ginahaboy batuk sa ila.
