ROXAS CITY – Nagapati ang Makabayan-Capiz nga may yara sang dinaya-ay nga natabo sang pagpiniliay sa nasyunal nga posisyon ilabi na sa pagka-presidente kag bise-presidente.
Ini ang ginpahayag ni Roland Navales, Coordinator sang Makabayan-Capiz sang mainterview sang Bombo Radyo.
Suno diri, makatilingala ang kadamuon nga nakuha nga boto ni Ferdinand “Bongbong” Marcos Jr. bangud kun paga-basehan lamang ang mga nagtambong sa rally sang pila ka mga kandidato wala ini naga-tally kag ini ang indi mapatihan.
Ginpahayag man ni Navales, nga isa sa pinaagi sang pagdaya amo ang pag-appoint sang nagapungko nga administrasyon sang mga opisyal sa COMELEC agud madali ang pag-manihar sa mangin resulta sang eleksyon.
Nagapati ini nga may yara sang anomalya nga ginhimo ang Marcos-Duterte tandem agud masiguro ang kadalag-an sa eleksyon bangud sa napagkit nga mga kaso sang malfunctions sa mga vote-counting machine (VCM) sa nagkalain-lain nga lugar, pagdelay sang mga boto kag harassments.
Suno kay Navales magapatigayon ang Makabayan-Capiz buwas nga adlaw sang hublag protesta agud ipahanumdum sa gobyerno ang natabo nga dinaya-ay sang Mayo 9 kag ipalab-ot ang pagkadismaya sa nangin resulta sang pagpiniliay.
Nagalaum si Navales sa pagpungko ni Marcos Jr. bilang bag-o nga presidente sang Pilipinas, nga mahatagan sini sang sabat kag aksyon ang mga pumuluyo, kag sektor nga nagakinahanglan, kag nagapangabay ini nga indi mangin kasubong sang iya amay nga kapintas ang ginhatag sa mga Pilipino.
