ROXAS CITY – Mamantinir kami sa hayug-hayug kag antuson ang ulan init kay wala kami istaran, ini ang ginpahayag ni Nanay Racilita isa sa mga pumuluyo nga apektado sa ginpatigayon nga demolasyon sa Sitio Ellieta, Barangay Banica, Roxas City.
Sa interview sang Bombo Radyo kay Nanay Racilita, ginpahayag sini nga masakit sa iya balatyagon ang pagpahalin sa ila sa lugar bangud kapin 43 ka tuig na ini nga naga-istar sa amu nga lugar.
Suno diri, sumugod nga nag-istar sila diri nagabayad sila sang P500 kada bulan apang sumugod sang nagligad nga tuig wala na nagbaton sang nasambit nga balor ang tag-iya sang duta bangud plano sini nga ibaligya ang iya propedad.
Mahibaluan nga yara sa 10 ka puluy-an ang nakatindog sa pribado nga duta.
Sa karun, nagapanawagan na lamang si Nanay Racilita sang dako nga bulig kay Roxas City Mayor Ronnie Dadivas agud mahatagan sila sang puluy-an nga ila istaran kaupod ang iya pamilya.
