ROXAS CITY – Naghatag sang sabat ang alkalde sang banwa sang Mambusao natuhoy sa pagkadakop sang ginapanag-iyahan sini nga heavy equipment nga ginaalegar ginagamit para sa illegal quarry operation sa Barangay Manhoy, Dao, Capiz.
Suno kay Mayor Leodegario Jun Labao, Jr., gintawagan siya sang iya umagad nga ginadakop ang iya nga backhoe sang Task Force Kabalaka 6K kag Capiz Environment and Natural Resource Office (CaPENRO) rason nga ginpakamaayo sini nga padulungan ang lugar agud makapangusisa.
Ginpahayag sini nga sa iya pag-abot, nakibot siya bangud may mga kaupod ang hubon nga mga naka-sibilyan nga armado nga mga indibidwal nga sang ulihi natukiban nga mga kapulisan.
Ginpanginwala sini ang alegasyon nga may mga kaupod siya nga mga bodyguards sa pagpadulong sa lugar bangud ang iya lamang driver kag iya umagad ang iya nga kaupod.
Luyag lamang kuntani sang alkalde nga usisaon kun may mga legal order ang hubon agud dakpon ang nasambit nga heavy equipment.
Ginklaro man sini nga siya ang una nga nagpadulong sa talatapan sang Dao PNP bangud nakibot siya nga may mga armado nga persona sa lugar.
Ginpanindugan man sini nga wala sang nagakahinabo nga illegal quarry sa lugar bangud nagabulig lamang ini sa pagtapan sang duta bangud ini ang ginaplanuhan nga patindugan sang balay.
Gindugang pa sang alkalde nga ginapasa-Diyos na lamang sini ang tanan pananglitan pasakaan siya sang reklamo natuhoy sa pag-upang sini sa operasyon sang nasambit nga task force.
