ROXAS CITY – Pilas sa nawala nga butkon ang naangkon sang 42-anyos nga manghod nga ginbuno sang hubog nga magulang sa ila puluy-an sa Barangay Timpas, Panit-an, Capiz.
Ginpadangat sa ospital agud mabulong ang pilas sang biktima nga si Julius Buday sang amo nga lugar.
Ba-se sa report sang pulisya sa banwa sang Panit-an nga nagapaniapon ang biktima sang nag-abot ang magulang nga si Robel Buday 43-anyos kag gin-akat ini nga mag-inum.
Bangud wala pa sang sweldo kag wala sang kuarta, nagpamalibad ang manghod.
Ginkaakig ini sang magulang kag hinali lamang nga ginbuno niya ang biktima gamit ang kutsilyo apang nasagang sang nawala nga butkon nga amo ang napilas.
Matapos nga gindala sa ospital ang biktima, nagpalagyo naman ang suspek kag sa karon ginapangita na sang kapulisan.
