Mangin alerto sa palibot kag tsekyaron ang kuwarta nga ginabayad sang mga bumalakal agud malikawan nga mabiktima sang peke nga kuwarta – TATC Administrator

ROXAS CITY – “Be on guard all the time.”

Ini ang ginpahayag ni Mrs. Heloise Mendoza, Administrador sang TATC sang mainterview sang Bombo Radyo.

Suno diri, agud malikawan nga mabiktima sang peke nga kuwarta mangin alerto sa palibot kag tsekyaron ang kuwarta nga ginabayad sang mga bumalakal ilabi na kun P500 ukon P1,000 bill.

Ginpahayag sang administrador nga may yara sang auxillary guards nga nagalibot agud mamonitor ang nagakahinabo sa sulod sang TATC.

Nagapati si Mendoza nga grupo ang mga suspek nga nagapanunto kun sa diin ginabantayan nila nga madamo sang bumalakal kag sinakuay ang transaksyon antes himuon ang ila modus.

Posible suno diri nga bangud sa kapigaduhon nahimo sang mga suspek ang magpanunto agud maka-kuwarta.

Nagahinyu naman ini sa hepe sang Roxas City PNP nga magdugang sang kapulisan nga igadeploy sa TATC agud malikawan ang paglapnag sang krimen.