DUMALAG CAPIZ – Personal nga nagpadulong sa talatapan sang Bombo Radyo, ang isa ka mangunguma agud ireklamo ang ila barangay officials kag Department of Agriculture sa banwa sang Dumalag matapos wala madala sa listahan sang mga benepisyaryo nga makabaton kun tani sang ayuda matapos maigo sang el nino.
Sa exclusive interview sang Bombo Radyo kay Mr. Arvin Farinas mangunguma kag residente sang Barangay San Martin, Dumalag, Capiz ginpahayag sini nga dako nga palamangkutanon sa iya kag iya pamilya kun ngaman wala sila nadala sa listahan bangud kun lantawon qualify sila nga apat ka pamilya bangud gin-igo sang el nino ang ila pananum.
Suno kay Farinas, nagpa-ensured sila sa DA agud pananglitan nga mapiyerde ang ila produkto may mabaton sila nga ayuda nagikan sa gobyerno national apang dako ang ila pagkadismaya bangud halos tanan nga mga barangay officials sang ila barangay yara sa listahan apang sila nga mga mangunguma kag lubos nga nagakinahanglan nawigit pa.
Mahibaluan nga nagtan-ay sang bulig pinansyal ang gobyerno national para sa mga mangunguma nga naapektuhan sang el nino pinaagi sa Department of Agriculture (DA).
Ginsiling pa ni Farinas nga nagpadulong siya sa ila barangay agud kun tani nga pamangkuton kun ngaman wala sila nadala sa amu nga programa, apang ginsabat ini siya nga wala sila suno diri nakahibalo kun anu ang proseso bangud ang listahan suno diri ang nagikan na sa DA.
Bangud sini, ginpakamaayo ni Farinas nga magpadulong sa talatapan sang DA sa ila banwa agud klaruhon kun anu ang instakto nga proseso agud ma-qualify apang sabat sa iya nga pagadal-on o galing sila sa masunod nga batch.
Mensahe ni Farinas sa opisyales sang ila barangay kag DA nga kun tani himuon sang mga ini ang ila obligasyon sang instakto kag hatagan sang nagakaigo nga sabat ang mga mangunguma nga nagadangop sa ila.
