DUMARAO, CAPIZ – Patay ang isa ka mangunguma matapos ginbuno sang ginapahayag may deperensya sa paminsaron sa Sitio Kalubihan, Brgy. Aglanot, Dumarao, Capiz.
Ang wala na ginhingadlan nga biktima ang isa ka lalaki nga nagapang-edaron sang 57-anyos nga residente sang nasambit nga lugar samtang ang ginapahayag suspek nga may deperensya sa paminsaron ang isa man ka lalaki kag yara sa legal nga pang-edaron nga residente naman sang Sitio Labatucan, sa amo nga Barangay.
Suno kay PLT. Irene Toos sang Dumarao Municipal Police Station, ginapahayag nga samtang nagahulat sang panyaga kag nagapungko ang biktima sa pulungkuan sa guwa sang balay sang iya himata nga ginkumpanyaran , hinali nalang ini nga ginpalapitan sang suspek kag ginbuno nga wala sang ano man nga rason.
Nag-angkon sang patal nga pilas sa tiyan kag nawala nga kamot ang biktima nga gintunaan sang iya kamatayon.
Gilayon naman nga gin-aresto sang mga Brgy. Tanod ang suspek kag sa karon yara na ini sa Western Visayas Medical Center – Department of Psychiatric for Rehabilitation.
Samtang, wala pa makadesisyon ang pamilya sang biktima kun mapasaka ang mga ini sang kaso.
