ROXAS CITY – Dead on arrival sa ospital ang mangunguma matapos ginluthang sang bayaw nga kapitan takna 11:50 kagab-I, Marso 3, 2024 sa Barangay Carataya, Maayon, Capiz.
Ginkilala ang biktima nga si alyas ‘Edwin’, 45-anyos samtang ang ginatudlo nga suspek amu si Punong Barangay Mario Bornales, 49-anyos, lunsay mga residente sang nasambit nga lugar.
Sandig sa imbestigasyon sang Maayon Municipal Police Station, samtang yara sa ila puluy-an ang biktima hinali nga nag-abot si Kapitan Bornales agud kumprontahon ang biktima nahanungod sa ginaalegar gin-utod sini nga kahoy nga ginapanag-iyahan ni Bornales.
Diri na, ginluthang sang kapitan ang biktima gamit ang wala pa matumod nga sahi sang armas-luthang.
Bangud sini, nag-angkon sang pilas sa natuo nga abaga ang biktima nga gindala naman sa Bailan District Hospital apang wala ini nakasalbar sa kamatayon.
Samtang, nagpatigayon naman sang hot pursuit operation ang kapulisan bangud gilayon nga nagpalagyo ang kapitan matapos makomiter ang krimen.
