TAPAZ, CAPIZ – Padayon ang hot pursuit operation sang Tapaz Municipal Police Station agud madakpan ang nagpalagyo nga suspek nga nagpanglabo sa isa ka mangunguma sa National Road sa Sitio Quinalian, Barangay Apero, Tapaz, Capiz.
Ang biktima amo si alyas “Panday”, 51-anyos, samtang ang suspek amo si alyas “Nonoy”, 34-anyos, kag lunsay mga residente sang nasambit nga lugar.
Sa interview sang Bombo Radyo kay PCAPT Jobert Delos Reyes, Hepe sang Tapaz Municipal Police Station, iya ginpahayag nga samtang nagapungko sa iya nga motorsiklo si Nonoy sa guwa sang iya nga puluy-an, nagpalapit si Panday sa iya nakaparada nga motorsiklo nga malapit sa ginapungkuan sang suspek. Nag-angkon sang mainit nga pagbinaisay ang duha matapos nga ila gin-istoryahan liwat ang madugay na nga hiligut-anon kun sa diin ginbuno sadto sang suspek ang biktima.
Sa tunga sang mainit nga pagbinaisay, una nga nagkuha sang patalom si Panday, apang gilayon naman nga nagbalos si Nonoy kag gingabot ang dala niya nga binangon nga ginagamit sa bukid kag ginlabo si Panday sa liog.
Nag-angkon ini sang patal nga pilas kag gindala ang biktima sa Tapaz District Hospital apang ginsaylo sa Roxas Memorial Hospital sa Roxas City para sa dugang nga pagbulong.
Samtang, nagpalagyo naman ang suspek sa direksyon padulong sa Barangay Roxas, Tapaz.
Naguwa sa imbestigasyon sang kapulisan nga pareho nakainom sang makahulubog nga ilimnon ang duha sang natabo ang insidente.
