ROXAS CITY – Nagdangat na sa masobra P355 million ang ginbilin nga kahalitan sang nag-agi nga bagyong Agaton sa mga kauyaparan sa probinsya sang Capiz.
Sa interview sang Bombo Radyo kay Mrs. Sylvia Dela Cruz, Provincial Agriculturist, ginsiling sini nga nagpatigayon na sila sang assessment sa nangin kahalitan sang bagyo sa sektor sang agrikultura sa Capiz.
Nagaguwa sa ila assessment nga ang kalaparon sang ulumhan nga naapektuhan sang bagyo ang nagdangat sa 8,481.18 hectares ukon may kahalitan nga P355,451,105.93 nga apektado ang 8,776 ka mga mangunguma sang palay.
Sa mangunguma sang mais, may yara sang 1,808.66 hectares, kag may P60,775,977.96 nga kahalitan sa 2,047 ka mga corn farmers.
Samtang sa high value commercial crops (utan, prutas kag iban pa), apektado ang 3,301 ka mangunguma, 898.41 ka ektarya kag may kahalitan nga P66,410,528.
Sa bahin sang apektado nga fisherfolks, ginpahayag ni Dela Cruz nga sandig sa report sang BFAR, may yara sang 1,228 ka mga apektado nga may kabug-osan nga P57,542.75 nga kahalitan.
Matapos nga ginpaidalom ang bug-os nga probinsya sa State of Calamity, ginapadasig sa karon ang pagplantsa sang guidelines para sa loan program, kun sa diin mahimo maka-apply sang P10,000 kada farmer nga 0% interest sa sulod sang tatlo ka tuig.
Ginapasuguran naman sa mga Munisipyo ang paglista sa mga totally affected nga mangunguma nga amu ang kwalipikado sa amu nga loan program.
