ROXAS CITY – Aminado ang alkalde sang banwa sang President Roxas, Capiz nga nakalab-ot na sa iya atensyon ang pagpapirma sa isa ka manifesto sa mga alkalde sa premier kag segundo distrito ni Mambusao Mayor Leodegario ‘’Jun’’ Labao Jr., nga magapadalagan bilang presidente sang League of the Municipalities of the Philippines (LMP) Capiz chapter.
Suno kay Mayor Receliste ‘’Tanoy’’ Escolin, wala ini nabalaka kun naghimo sang kasubong nga tikang si Labao, bangud isa ini sa mga istratehiya sang alkalde sang Mambusao.
Gintuad pa ni Escolin nga iya man na-estorya ang ginbisitahan nga mga alkalde nga nag-ako sang ila pagpirma sa ginpalagaw nga manifest of support para sa kandidatura ni Labao.
Apang ginklaro sa iya nga wala nagapatimaan kun nagpirma sila, masiguro na ni Labao ang ila nga suporta.
Ini bangud posible pa nga magbag-o ang ila desisyon sa maabot nga eleksyon sa LMP sa masunod nga bulan sang Hulyo.
Nagapati man si Escolin nga indi basehan sa kadalag-an sa amo nga posisyon ang pirma sang mga alkalde, bangud posible ang iban napilitan lamang kag nahuya.
Samtang ginklaro man sang alkalde nga personal ini nga nagpakigkita kay Governor elect Esteban Nonoy Contreras kag Capiz 1st District Congressman elect Emmanuel Billones Sr. kag ginpalab-ot ang iya plano nga magpapili sa LMP Capiz chapter.
Plano man sini nga makig-angut kay 2nd District Congressman Fredinil Castro agud mapalab-ot man sa kongresista ang iya plano.
Nangin halangpon lamang ang ginbuy-an nga pahayag ni Escolin angut sa pagrespeto sa nagdaug nga mga opisyales sang probinsiya, sa pihak nga indi sila magka partido.
