ROXAS CITY, CAPIZ- Nagpaabot sang reklamo sa Bombo Radyo ang isa ka manugbaligya sang bulak matapos nakibot ini sa bayad nga P500 nga ginapangayo agud lang makabaligya sa sulod sang Villareal Stadium sa tion sang graduation sang isa ka pribado nga eskwelahan sang kolehiyo kahapon, Hunyo 13.
Suno kay Alyas Neneng, isa ka crafter kag dugay na nga nagabaligya sa mga okasyon sa syudad, subong pa lang siya nakaeksperyensya sang bayad nga amo kamahal.
Ginsaysay niya nga antes sila magplastar sang ila paninda, ginsilingan sila nga dapat magkuha anay sang business permit sa Business Center.
Nagkuha man sila sang permit, kag suno sa iya, ang empleyado nga nag-process sang permit nagsiling nga kinahanglan nila magbayad sang P500 sandig sa mando halin sa babaw.
Apang ginkakibot ni Neneng nga bisan pa may permit sila, wala man sila sang husto nga lugar nga malugaran — sa diin wala sang pulungkuan, lamesa, kag sa kilid lang sila sa sulod sang stadium nagplastar sang ila mga bulak kag garland.
Dugang pa sang natungdan, wala man naubos ang ila paninda bangud damo man sang manugbaligya sa sulod, kag may iban pa nga wala sang business permit pero nakasulod gihapon tungod may kilala suno diri sa babaw.
May nakita pa ini nga ang iban nga baligya ginapasulod lang sa sulod gamit ang plastic ukon garbage bag agud indi madakpan.
Ginabanta ni alyas Neneng nga mga 20 ka mga crafter ang nagkuha sang business permit.
Suno sa iya, okay lang man magbayad sang bayad kon maayo man lang ang sistema kag patas ang implementasyon sini.
Ginapangabay sang mga manugbaligya sa mga natungdan nga kon may bayad man, dapat patas, maayo ang sistema, kag may husto nga lugar para sa ila paninda.
