ROXAS CITY – Pilason ang duha ka mga persona matapos mabungguan sang motorsiklo ang traysikol nga ginamaneho sang manugbaligya sang isda sa National Highway sang Barangay Atiplo, banwa sang Mambusao.
Ginkilala ang driver sang traysikol kay Hernand Opher, 27-anyos, manugbaligya sang isda, kag residente sang Barangay Maninang, banwa sang Sapian.
Samtang ang driver sang motorsiklo amu si Lowell Fernandez, 18-anyos, kag residente sang Barangay Atiplo, Mambusao, Capiz.
Sandig sa imbestigasyon sang mga katapo sang Mambusao MPS, nagpundo ang traysikol agud baligyaan sang isda ang nagpara sa ila, apang nabungguan ang mga ini sang nagasunod sa ila nga motorsiklo.
Bangud diri, nag-angkon sang kapilasan sa magkatuhay nga parte sang ila lawas ang duha ka mga driver sang salakyan, samtang wala naman napilasan ang sakay sang traysikol nga timbang sa pagbaligya sang isda.
Ginpadangat sa Dao District Hospital ang driver sang traysikol, samtang sa Mambusao District Hospital ang driver sang motorsiklo.
Nakakustodiya sa karon ang magtimbang nga salakyan sa Mambusao MPS, para sa nagapadayon nga imbestigasyon.
