Nakibot ang isa ka sanitation worker sa Ohio, sang makita niya ang isa ka buhi nga tawo nga nagapanago sa basurahan nga iya kuntani ibutang sa iya truck.
Sa video nga gin-post sang Huber Heights Police Department sa ila Facebook account, makita sa dashcam ang sanitation worker nga nagaposisyon sang trash bin sa likod sang truck agud ihaboy ang unod sini nga basura kuntani.
Apang sang gin-alsa niya ang taklob sang basurahan, nakibot ang garbage collector kag nag-atras bangud may tawo ini sa sulod.
Makita ang sanitation worker nga nagakaway-kaway sa tawo nga yara sa sulod sang basurahan.
Antes ang insidente, ginpunggan na sang mga pulis ang isa ka suspek nga ila gintawag nga “Oscar the Grouch,” apang nakapalagyo ini sa salakyan kag nagdalagan tubtob nga wala na siya makita sang mga pulis.
Gilayon nila nga ginpangita ang lugar tubtub nga nadakpan sang isa ka garbage collector ang suspek nga nagapanago lang sa sulod sang basurahan.
Apisar liwat nga nagpalagyo ang suspek, ginpahayag sang Huber Heights Police nga luwas ini nga nadakpan sang ila mga tinawo.
