Wala na sang kabuhi sang nasapwan ang isa ka lalaki sa sulod sang Tanod Outpost sa barangay Libas, Roxas City.
Ginkilala ang amu nga bangkay kay Rolen Batobatan, 46-anyos, manugpangisda kag residente sang Cadiz City, Negros Occidental.
Sa pagpakig-angut sang Bombo Radyo kay Punong Barangay Jobby Nalica, sang barangay Libas, ginpahayag nga natigayon nga madiskubre nga may yara sang bangkay sa amu nga Tanod Outpost bangud sa reklamo sang mga residente sa indi
ordinaryo nga baho sa lugar kag gilayon ini nga ginpadulungan sang mga barangay Tanod.
Sa ila nga pagtsekyar wala sang nakita nga butang ukon anuman nga hinangiban nga posible rason sang iya kamatayon.
Mahibaluan, nga naga-isahanon nga nagapangabuhi sa syudad sang Roxas ang amu nga persona kag ginabulubanta may yara na sa tatlo ukon apat ka adlaw nga ginbawian sang kabuhi ang amo nga persona.
Sa karon, padayon pa ang maid-id nga imbestigasyon sang mga katapo sang SOCO kag mga katapo sang Roxas City PNP agud matumod ang gintunaan sang kamatayon sang nasambit nga persona.
