PRESIDENT ROXAS, CAPIZ- Mabuot, mahinatagon kag madasig nga magbulig nga klase sang tawo kag utod ang manugpangisda nga nadula sa banwa sang President Roxas, Capiz kadungan sang pag-igo sang Bagyo Tino sa probinsya.
Ang manugpangisda amo si Sherwin Banton Jabonete, 41 anyos kag residente sang Barangay Pinamihagan, President Roxas, Capiz.
Sa interview sang Bombo Radyo kay Mellia Jabonete, utod sang biktima, iya ginpahayag nga makuha kuntani ang iya nga magulang sang tangaban (kawayan nga may lambat) sa lawod, rason nga naglakat ini takna las 4:30 sang kaagahon kag wala na nga makapauli sa ginaluaman nga oras.
Suno kay Mellia, may pila ka mga manugpangisda man ang nakakita sa bangka nga ginasakyan ni Sherwin apang wala sang tawo. May nagpahayag man nga nakabati sila sang nagasinggit sang tabang apang wala ini nila ginsapak sa pagpati nga ginatuntuhan lang sila sang iban nga tinuga sa dagat.
Pahayag nya, yara sa sulod sang isa kag tunga sa adlaw nga nadula ang iya nga utod antes ini nga nakita nga wala na sang kabuhi sa Sitio Punta Bungkayaw, Barangay Butacal, Panay, Capiz sang Nobyembre 6 takna las 2:00 sang hapon.
Nahibaluan nga subang sa pito ka mag-ulutod ang biktima kag may pamilya nga may yara sang duwa ka mga kabataan. Isa man ini ka chief tanod sang ila nga barangay.
Sa pihak sang amo nga hitabo sa ila nga pamilya, nagpalab-ot naman sang pagpasalamat si Mellia sa mga katapo sang kapulisan, Philippine Coast Guard, Bureau of Fire Protection, Municipal Disaster Risk Reduction and Management Council kag sa ila nga alkalde sa pagbulig nga mapangita ang ila nga utod.
Sa subong, nagapabilin pa sa isa ka punerarya sang nasambit nga banwa ang bangkay sang biktima kag igahaya ini sa ila nga puluy-an.
Interviewed by Bombo Sunnie Mae Constantino Batencila
