ROXAS CITY, CAPIZ- Tuman nga kalipay ang nabatyagan sang isa ka manunudlo nagikan sa syudad sang Roxas, Capiz nga si Mrs. Michelle Ong, School Directress sang isa ka pribado nga eskwelahan sa Pueblo de Panay, Roxas City, sang personal nya nga nakita kag naka-istorya ang 32ka-tuig na nya nga gin-idolo nga psychologist, manunulat kag amay sang Theory of Multiple Intelligences nga si Dr. Howard Gardner.
Sa interview sang Bombo Radyo kay Mrs. Michelle, iya ginpakigbahin nga natigayon ang tumalagsahon nga tagpo nila sang iya nga idolo pamaagi sa pagpadulong nya liwat sa iya nga gina-eswelahan sa Massachusetts, USA amo ang Harvard Graduate School of Education sa diin nga isa sa ila nga panelist amo si Dr. Gardner.
Dugang pa sini, bangud sa amo nga kahigayunan, wala nya na ginpalampas pa kag didto nakighinala kag ginpagkumpirma ang mga pamangkot nga yara sa iya nga kaisipan sa diin suno sa iya nga madamo gid sya sang nakumpirmar kag napamatud-an.
Nahibaluan nga si Dr. Gardner ang isa ka prominent figure sa patag sang edukasyon, kilala ini sa iya Multiple Intelligences Theory — isa ka konsepto nga nagatalakay sa nagkalain-lain nga pamaagi sang pagpahayag kag development sang kaalam sang isa ka tawo. Kalakip sa iya nga obra amo ang nagkalain-lain nga kaalam sang tawo kaangay sang sa musical, linguistic, logical-mathematical, spatial, bodily-kinesthetic, interpersonal, intrapersonal, kag naturalistic.
Pahayag pa ni Mrs. Michelle, ang amo nga tagpo nila ni Dr. Gardner naghatag sa iya sang inspirasyon nga mas pasangkaron pa ang pagtudlo sa mga kabataan sa iya sini nasakupan nga instusyon kag isa ka linya suno sa iya nga indi nya malipatan nagikan sa amo nga manunulat amo ang indi insigida paghusgar sa isa ka tawo sa una palang na bes nga imo ini nakita kag wala sang mango nga tawo apang kinahanglan lang ini nga madevelop kag mahatagan sang nagakaigo nga igtalupangod.
Ginsiling man sini nga sa karon ang iya nga pagatutuakn ang pagpasangkad sa sistema sang edukasyon system pamaagi sa paghatag sang isa ka human-centered kag child –friendly environment nga eskwelahan.
Gipakigbahin pagid sini nga ang teorya ni Gardner ang nangin dako nga inspirasyon sa approach man sang ila nga eskwelahan sa diin nga nagapromote sang equal recognition kag suporta sa tagsa ka mga kabataan, apisar may yara ini sang nagkalain-lain nga lebel kag sahi sang kaalam nga natural nila nga naangkon.
In an interview with Bombo Francis Biñas and Bombo Sunnie Mae Batencila
