ROXAS CITY – Nagapabilin nga kritikal ang kondisyon sang manunudlo matapos ginapahayag gin-atake sang baka ang ginasakyan sini nga motorsiklo sa Barangay Bilao, Sapian Capiz.
Ang amu nga biktima isa ka public school teacher kag residente sang Barangay Dapdapan samtang ang driver sang motorsiklo ang nagapang-edaron sang 50-anyos kag residente naman sang Barangay Agtatacay Norte sa amu nga banwa.
Sa interview sang Bombo Radyo kay PCPt. Merry Chris M. Dela Cruz hepe sang Sapian Municipal Police Station, ginpahayag sini nga sadtong Hulyo 29, 2024 papauli na kun tani ang biktima sakay sang motorsiklo apang pag-abot sa lugar kun sa diin ginluntaran sang insidente hinali lamang nga gin-atake sang baka ang motorsiklo nga ila ginasakyan kabangdanan sang ila pagkatumba.
Bangud sa natabo nag-angkon sang minor nga pilas ang driver sa magkatuhay nga parte sang iya lawas apang ang manunudlo nadulaan sang alinto matapos nga nagtabog.
Mahibaluan nga tubtob subong nagapabilin nga comatose ang manunudlo kag padayon nga ginabulong sa isa ka ospital sa probinsya sang Iloilo.
Suno kay Dela Cruz, natumod na ang pagkakilanlan sang tag-iya sang amu nga baka kag sa karun nagahulat pa sila kun anu ang mangin desisyon sang pamilya sang biktima angut sa nasambit nga insidente.
Panugyan sini sa publiko ilabi na sa may mga hinuptanan nga sapat nga mangin responsable nga tag-iya kag siguraduhon ang pahamtangan nga lugar ng malayo sa tawo kag indi makaperwisyo.
