Nagpaathag ang isa sa manunudlo sang Capiz National High School nahanungod sa ginaalegar balayran sa performance sang ila mga estudyante.
Sa interview sang Bombo Radyo kay Ireen Dionio, Curriculum Chairman- Senior High School sang Capiz National High School, iya ginklaro nga wala ginapasugtan sang eskwelahan ang magpanukot sang kantidad para sa anuman nga aktibidad.
Suno kay Dionio, gin-advisan nila nga magamit lang sang improvised nga costume apang inisyatibo sang mga estudyante ang pag-amutay kag magkuha sang trainor para sa nasambit nga performance.
Pahayag pa niya, una na nga nagpatawag sila sang meeting kaupod ang mga ginikanan agud ipaathag nga ang contribution ang ginkasugtanan sang mga estudyante para sa ila nga culminating performance.
Nahibaluan nga nagpa-bombo ang ginikanan sang isa ka estudyante bangud sa kabug-at sa bulsa sang balayran para sa performance sang iya bata.
Nagahingyu man ang natungdan sang suporta sa mga ginikanan kag nagpasalig nga mapabilin sa gihapon ang kalidad nga pagtudlo.
