Kabug-osan nga 1,043 personnel sang Philippine National Police ang na-dismiss sa serbisyo humalin Enero 1, 2025 tubtob Disyembre 3, 2025.
Suno kay PNP Spokesperson Police Brigadier General Randulf Tuaño, ang nasambit nga numero ang ginalakipan sang 980 ka mga police non-commissioned officers, 39 ka mga police commissioned officers, kag 24 ka mga non-uniformed personnel.
Pahayag niya, ang highest rank sang police officer nga na-dismiss sa serbisyo ang isa ka police colonel.
Kadam-an sa mga dismissed nga pulis amo ang patrolmen nga may 335, police staff sergeants nga may 292 kag police corporals nga may 259.
Ang nagapanguna nga rason sang pagkakas sa ila amo ang absent without official leave (AWOL) nga may 590 cases, illegal drug use nga may 82, robbery kag extortion nga may 39, kag iban pa nga grave offenses nga may 220.
Sandig sa PNP, kadam-an sa mga dismissed personnel ang nagikan sa National Headquarters nga may 258, National Capital Region Police Office (NCRPO) nga may 219, kag Police Regional Office 3 (PRO3) nga may 114.
