Ginapa-explain sang Land Transportation Office ang masobra 200 driving school sa pungsod bangud sa alegasyon sang tampering sa ila computer systems agud maakomodar ang madamo nga estudyante.
Suno sa ahensya, gin-issue na ang show cause orders sa mga driving schools bangud sa pipila ka mga violations lakip na ang pag-upload sang madamo nga theoretical kag practical driving course certificates kag ang issuance sang amo nga certificates apisar wala pa makompleto sang aplikante ang required number sang oras.
Nagmandu man ang LTO sa 88 ka mga district heads nga sakop sang masobra 200 ka mga driving schools nga magpaathag kun ngaa ginpahanugutan nila nga magpatigayon sang amo nga aktibidad ang driving schools kag kun ngaa wala pa ini gilayon masolbar.
Matandaan nga sang nagligad nga bulan, ginpang-suspend sang LTO ang masobra 100 ka mga driving schools bangud sa no-show ukon non-compliance sa insakto nga theoretical driver’s trainings.
