Nakumpiskar sang mga katapo sang Department of Agriculture (DA) pinaagi sang Bureau of Plant Industry (BPI) nga kaupod ang Bureau of Customs (BOC) ang indi magnubo sa 25 metric tons sang smuggled nga pula nga sibuyas nga halin sa China sa Misamis Oriental.
Suno sa DA, ang kargamento nag-abot sang Mayo 26 nga gin-deklarar nga frozen goods pareho sang egg noodles, croissant, dough, pizza dough, buns, kag spring rolls.
Una nga ginharangan ang pag-guha sang kargamento para sa “dugang nga inspeksyon” suno sa request sang BPI-Plant Quarantine Service sa Cagayan de Oro sa BOC.
Suno sa DA, ginhimo ang physical examination sang Hunyo 11 kag nadiskubrehan ang pula nga sibuyas nga wala nakalista sa manifesto sini.
Base sa pagbulubanta sang mga otoridad, ang balor sini ang yara sa P2 milyon.
Pagkatapos sang pagkadiskubre, ginrekomendar na ang pagkumpiskar sang amo nga shipment.
Ginpaandaman liwat ni Agriculture Secretary Francisco Tiu Laurel Jr. ang mga nagaplano nga magpasulod sang mga smuggled nga sibuyas samtang wala sila nagapaguha sang import clearance subong.
