Naglab-ot na masobra 5,000 ka tawo ang napatay sa nagapadayon nga hublag-protesta sa Iran, lakip ang mga 500 ka mga security force, suno sa isa ka lokal nga opisyal.
Ang mga “terorista kag armado nga mga rebelde” amo ang responsable sa kamatayon sang mga inosente nga Iranian.
Suno sa US-based human rights group (HRANA), 3,308 ang kumpirmado nga napatay, samtang 4,382 pa ka mga kaso ang gina-imbestigaran, kag masobra 24,000 ang nadakpan.
Madamo nga mga pumuluyo kag mga video sa social media ang nagapakita sang mga pwersa sang estado nga mapintas nga nagapugong sang mga demonstrasyon, lakip ang direkta nga pagtiro sa mga nagaprotesta, nga kalabanan sa ila mga pamatan-on.
Matandaan nga nagluntad ang protesta sa Iran sang Disyembre 28 sang nagligad nga tuig bangud sa krisis sa ekonomiya, tubtob nga nagsangkad ini sa lapnagon nga panawagan para sa pagtapos sang pagginahum sang subong nga rehimen.
Sa pihak nga mga aksyon sang estado, ang Supreme Leader nga si Ayatollah Ali Khamenei nagsiling nga indi nila pagpasugtan ang pungsod nga maguba bangud sa giyera, apang ginpasalig niya nga ang mga responsable sa kinagamo pagasilutan, kun sa diin ginabasol sang Supreme Leader ang Amerika kag Ukraine nga ginaalegar nga yara sa likod sang linibo ka mga kamatayon sa tion sang mga protesta sa ila pungsod.
