ROXAS CITY – Nakabanepisyo ang 11,830 ka mga kliyente sa probinsya sang Capiz, ukon P67,579,560 nga kantidad sang financial assistance nga ginpaguwa sang Provincial Social Welfare and Development Office (PSWDO), sumugod sang Hulyo 6, tubtob sa bulan sang Disyembre, tuig 2022.
Ini ang ginpahayag ni Mrs. Nieva Camposano, PSWDO head sang mainterview sang Bombo Radyo.
Suno diri, ini nga kantidad ang napaguwa sang ila ahensya sumugod sa pagsugod sang administrasyon ni Governor Fredenil Castro.
Ginakabug-osan ini sang FA sa medical (cash) nga P21,668,100 ukon may 6,123 ka mga kliyente; ginasundan sang Hospital (cash) nga P19,879,360 nga may 2,538 ka mga benepisyaryo; burial (promissory note) P18,880,300 nga may 2,312 ka mga kliyente; burial (cash) nga nakahatag sang P3,412,000 sa 510 clients; medical (cheque) nakapaguwa sang P2,355,500 ukon 129 ka mga kliyente; shelter P64,000 nga nahatag sa 9 tanan ka benepisyaryo kag Transportation nga may 1 ka nagpangayo sang bulig nga ginhatagan snag P4,000.
Ginpahayag man ni Camposano nga may P6,199,650 nga deficit ukon balayran ang lokal nga gobyerno sa mga ospital kag punerarya sang 2022, apang ginpasalig suno diri sang gobernador nga may pagakuhan ini nga pondo bilang pambayad.
Matandaan nga sang Disyembre 2022, naglimit ang probinsya sa 30 ka mga kliyente nga mahimo maakomodar sa isa ka adlaw.
Sa karon, ginpa-in sang PSWDO ang P900,000 kada semana bilang mahimo mapaguwa nga financial assistance apang kun kaisa indi mahimo nga magsobra sa sini nga target ang ila ginahatagan.
Pangabay ni Camposano sa mga nagapangayo sang bulig nga may gintalana ang ahensya nga waiting area, agud indi magginutok kag mangin organisado ang pila sa ila opisina.
