ROXAS CITY-Naglab-ut na sa 40,000 ka mga indibidwal ang natigayon na nga mabakunahan sa ginapatigayon nga mass vaccination sang gobyerno sa pungsod United Kingdom.
Sa interview sang Bombo Radyo Roxas sa kay Bombo International Correspondent Roland Crispo ginpahayag sini nga ginaprayoridad sang amo nga mass vaccination ang mga katigulangan kag mga frontliners sa amo nga pungsod.
Suno kay Crispo nga madamo ang nalipay kag luyag magpabakuna sa amo nga pungsod apang may yara man sang iban nga nagapang-alang alang nga magpabakuna.
Aminado ini nga indi bastante ang 40 million doses sang bakuna nga ginbakal sang gobyerno sa Pfizer Company agud mabakunahan ang bilog nga United Kingdom.
Gani, nagalauma ang iban nga makapaguwa sang kaugalingon nga vaccine ang pungsod nga gindevelop sang Astrazeneca sa Oxford University.
Samtang sa pihak nga bahin, tuman nga kalipay ang nabatyagan ni Crispo nga nagalaum nga mabakunahan sa madasun nga mga inadlaw.
Suno sa iya nga madugay na ini nga ginahandum sang bilog nga kalibutan nga makadevelop sang bakuna batuk sa makamamatay nga sakit.
Ginkalipay naman sini nga wala sang diskriminasyon pag-abot sa paghatag sang bakuna sa amo nga pungsod bangud nagpasalig ang gobyerno nga ang tanan nga mga residente ang mahatagan sang bakuna.
